الواد مصباح ابن عمى كاتب قصيدة حلوة خالص

تمن يومك

مصباح المهدى

عشان تقدر تعيش يومك
وتكبر يوم
تاكل بعضك
ماهوش بالضبط تاكل كل يوم حته
وباسم الله تمد إيدك
عليك إنك يكون لك حظ في التوضيب
نفر دقّاق .. نفر تشوين
نفر يقدر يجيب الصخر بالوادي
مافيش حاجة اسمها راضي ومش راضي
مافيش حاجة اسمها تعبان
تعبت تموت
) دراعك مش دراع خلّيك
وصدرك دَوّبه التسليك
بلاش منّكْ (
أنا كويس يا ريس بخت
جوايا اللي جاع قادر
على الشغل اللي مش توبي
وانا من توب قديم فَضْلَه
وع الفضله أنا عايش
عشان تاكل هتتاكل
ومن لحمك هتطلع بالمرق والعيش
ما دام عايز تعيش ..
باسم الله مد إيديك
ولو عايز تموت ..
اعمل حساب بكره :
كفن ..
أجرة مغسّل ..
ندّابين ..
تربه
ورسم مرور على الجامع
وجامع يعني زي الناس عمل مره
مادام عايز تعيش يومك وتكبر يوم
تاكل بعضك
ماهو مش بالضبط تاكل كل يوم حته
وبسم الله تمد إيديك