هناااااااااا... القاهرة

هنـا القاهــرة

ابن أخويا

مصباح المهدى

هيكونى صاحب بيت مش ضيف وبس فى مدونتى

ودى أول زياراته

***

هنا القاهرة وانت من كِردفانْ
هنا القاهرة الساحرة الألعبانْ
هنا القاهرة وانت بيتك هدومك
وفرشك همومك
ورزقك ليومك إذا قضّى يومك
هنا القاهرة وانت مش حمل غُربه
تفرَّغ همومك في ميت ألف قربه
طُرُق فيها ساعي
وصاحب مساعي
وأجرك إذا تمّ
سمّ الأفاعي
تقوم بالمهمّه
وتعمل محلّل
محلل سياسي
محلل جوازة
محلل جنازة
محلل براز
وتدخل جهاز الثقافة الإزاز
وتلمس بإيدك مجاز المجاز
تشوف حد فاضي
معلق رياضي
وشاعر وقاضي
وصاحب دكاكين ثقافه وأراضي
وصاحب مراكب سمك في اليونان
هنا القاهرة وانت من كردفان
هنا القاهرة الداعرة الألعبان
هنا الشعر من بِزّ أم السخافة
ومهد الثقافة هنا من زمانْ
هنا البنت لابسه ومن غير هدوم
تقوم تلقى نص القصيدة الغيوم
تطرقع لبانه
تهزّ اللي بانْ
هنا الاشتغاله
وناس عايشه عاله
على ناس بجد
هنا السوس مزقزق
فلا الصبح شقشق
ولا بكره بانْ
يالسمر يابو الجبهة محروته طيبه
وشربانه طيب
يا بو الصدر أرض الهلال الخصيب
ندي عنيك قريّب
ولك قلب طيب
ما يعرفش يعمل فى يوم بهلوان
هنا القاهرة
وانت من كردفان ،،،