مدن الغربة -- من سهير

مدن الغربة

قصيدة مهداة من الزميلة الشاعرة الكبيرة سهير متولى


هتفرق إيه
مدن بتشيل
مدن بتحُط
مدن صُدفه
ووحده تهد
هيخلص كل ما فيها مع الأيام
ما تقدر مره تعشقها
ولا تحسك شوارعها
ولا تبكي على فراقها
حضورك فيها كله غياب
شجرها يخاف من الأغراب
لا يرمي الضله على روحه
ولا يطبطب على جروحه
وطعم الفرحه فيها سراب
وشوش ناسها ما تتكلمش
عيونها ازاز ما تتبسمش
ولا تعرف لُقا الأحباب
لا تسمع فيها صوت بياع
ولا تلاميذ ف مدارسهم
يخبُط ليلها على بابك
يهاجمك صوت وطن مجروح
يرفرف جوه صدرك شوق
لجاره عجوزه تدعيلك
وبنت توارب الشباك
تطاردك ريحة الأيام
خبيز الكحك ف الأعياد
صلاة الجمعه
والوقفه مع الأصحاب
بيوت زحمه
بترمي كل أسرارها من الشباك
وفوضى الفرح والأحزان
وطن هربان ف شريانك
يخبّط جوه أحضانك
أسير والأسر أحزانك
تشوف كل اللي بيزُقك
يشدك لِيه
طابور العيش
وآخر الشهر والعوزه
بيدّاروا ف حته بعيد
مع اللي يراهنوا على حلمك
وحاجبين الوطن عنك
وباعوا الشمس والأشعار
ف مدن الغربه لو حسيت
نصيحتي بجد..
ما تحسش.