زهقان من نفسك؟

شعر/ سمير الأمير

مهداة إلى الصديق/ ابراهيم جاد الله

بعد حوارلحظة الهزيمة
*****
يا مشا الله عليك توفيقى بدرجة ممتاز
مش عايز تعرف إن العسكرى عسكرى
و ان المأمور مأمور
وان بلدنا بقالها سنين واقفة على كوبرى امبابة
وبتحاول ترمى نفسها فى النيل
بس النيل مش راضى
قالها روحى الأول شوفى
اللى اتفرج على الماتش و جاب لهم النكسة
خافوا يجيبوا اجوان لا الناس تفرح بيهم
ويقولوا اشمعنى سيادته مع انه
بقاله بيلعب اكتر من خمسين سنه
ما اتعلمشى يباصى لغيره
أيه؟

عايز خمسين سنه تانيين؟
علشان يعرف إن الكوره "تيم جيم
و إن الجون مايجيش غير لما اللعيبه
تعرف قيمة فرحة جمهور الدرجه التالته
وما تخافش م الرعب اللى لابس ملكى
وقاعد فى المقصوره

بقولك ايه؟
لو زهقان منه ومنى ومن نفسك
فانا متأسف جداً
اطلع ع السطح ودور على ديك يدن
فى العشش اللى فضيت بعد وباء الانفلونزا.